Aralarrek Oiolako urtegiko poluzioaren auzia Europako Parlamentura eraman du

Herritarrak kezkatuta daude, iturri horretatik hartzen baita herritarrek edaten duten ura. Herriko elkarteek egoera hori hainbat aldiz salatu dute erakunde ezberdinen aurrean, baina erakundeak ez dira arazoa konpontzeko gai izan.

Alianza Libre Europea (ALE) taldeko kide den heinean, Aralarrek Europako Parlamentura eraman du gaia eta bi galdera erregistratu ditu.

Egoeraren aurrean, Aralarrek sustatuta, herritarrek euren kexa formala aurkeztu diote Europako Batzordeari. Orain, tramitazioa jarraitu beharko du kexa horrek. ALE koalizioaren barne dagoen Aralarren ordezkariak konpromisoa hartu du herritarren aurrean, gai horri bultzada emateko eta Europako Batzordearen ikerketa bukaeraraino heltzen dela ziurtatzeko. Era berean, bi galdera erregistratuko ditu Bruselan, Ingurumen komisarioari zuzenduak. “Funtsean, pertsonen osasunerako oinarrizko eskubidea defendatzea dagokie erakunde publikoei. Eskubide hori bereziki zaintzea ezinbestekoa da”, adierazi du Irazabalbeitiak.